3. de seipso
Aonium, ut fierem vates, haurire liquorem
Optabam, et lauri nectere fronde caput.
Accessi ad fontes. vidit me Phoebus ab alto
Culmine. "quae poscis dona negantur," ait.
5
Eiectus, flevi. tandem, miserata labores,
Alma Venus, "Paphias i bibe," dixit, "aquas."
Accessi, et sitiens absorpsi mixta venenis
Pocula, et ignifero mersus in amne fui.
Nunc haec poena mihi, nam dicere cogor amores,
10
Non carmen, fati cantor et esse mei.