Daniele Fini carmina 15

Testo base di riferimento: S. Pasquazi, 1966

Cura dell'edizione digitale: M. Sartor, 2023


Iani Dalari mortem deflet

 

Quam cito mors rapuit te, Dalare; quam cito care

      Funestum sequeris maestus amantis iter.

Illam quintiles subito rapuere kalendae,

      Flere nequis raptam mensibus ipse tribus;

5

Vix era extinctus Dominae lacrimabilis ignis,

      Ligna tuis iterum sunt renovata rogis;

Insidiatrici perimit mors improba falce,

      Vtile vel pulchrum si quid in orbe videt.

Ingemis, et lacrimis irroras grandibus ora,

10

      Sole velut tectis nix liquefacta cadit.

Insolitus facie est pallor, gemebundus amaror

      Pectore, continuo vita dolore perit;

Aethera lamentis atrato corpore comples,

      Hirtus et est crinis, qui modo pexus erat;

15

Barbaque funestat lugubres hispida vultus,

      Cultus abest, nolunt sumere labra cibos;

Debile ieiuna macie fit corpus et ora,

      Quae fuerant iuvenis, sunt mihi visa senis.

Dixisti: leto vita est truculentior omni,

20

      Liquit amatorem nam mea Flora suum;

Secum delicias traxit, mea gaudia secum,

      Gaudia sidereis anteferenda bonis.

Quandoquidem iugi praecordia nostra dolore

      Pressa nimis, posthac iubila nulla ferent.

25

Vera quidem dixit; fuit haec tibi finis amandi,

      Orbe sub hoc, alio non tibi finis erit;

Illius en manes, felix quam semper amabis

      Orbe iacens alio, semper et ipsa tuos;

Astra per et campos Dominae vestigia quaeres

30

      Elysios, velut hic dum tibi vita fuit.

Non ultra hoc dices, venias; mea Flora recessit,

      Nunc facit ad tectum blanda sororis iter;

Nunc sua rura petit, nunc flores colligit hortis,

      Nunc subiit templum, nunc sedet ante fores.

35

Talibus et reliquis posuit mors invida finem,

      (Me miserum) finis quam celer iste fuit.

Vivere nestoreos ambo speravimus annos,

      Laetaque felices degere secla simul.

Aspice quam subito fatali pollice filum

40

      Ferrea subsecuit de tribus una soror;

Omnia cessarunt nobis haec gaudia; cessant

      Mille voluptates et tibi blanda Venus;

Namque tuum viridi corpus tellure quiescit,

      Estque sepulcralis nunc tuus urna torus.

45

Hic vice iucundi feralis naenia cantus,

      Hic vice iuniperi diva cupressus inest;

Heu, tibi quas taedas, heu quae connubia fecit

      Saevus Hymen, quali te posuitque toro.

Dum tua debebat viridis florere iuventa,

50

      Multaque cum Domina gaudia ferre tua,

Ambos florentes, annis iuvenilibus ambos,

      Vos rapuit celeri mors inopina pede;

Inscia dum Martis, Veneto Ferraria bello

      Angitur, unanimes vos necat atra lues.

55

Hei mihi contristor, letali infecta veneno

      Quod tua non tetigi membra, nec ipse manum;

Nec tibi triste vale solito de more reliqui,

      Nec potui tecum verba suprema loqui.

Di tibi dent caeli reseratas, Dalare, portas,

60

      Di quoque dent Dominae regna superna tuae.