Pro impetrando officio tabellionatus
Aequora, qui nescit dubiis dare lintea ventis,
Saepe fatigato remige, nauta secat;
Circuit ausonium per stagna iacentia littus,
Et vada litoribus proxima tutus arat;
5
Set timet euxini merces ad barbara ponti
Limina venales remige ferre suas;
Vel quia, quae tardis fit remis pigrior alnus
Saepe procellosis praecipitatur aquis;
Vel quia curvatis languescunt nautica tonsis,
10
Brachia quae nequeunt ulteriora sequi.
Navita sed vastum scindit rate saepius aequor,
Ventorum arbitrio qui sua vela dedit.
Deserit adriacos properato tramite portus,
Litoris illyrici trans mare verrit aquas;
15
Navigat ionios agitata per aequora fluctus,
Hellespontiaci iam maris ora domat;
Per freta, per scopulos, per flumina, per vada pinus
Illa exoptato flamine pulsa volat;
Ast ego flumineo sulcavi stagna phaselo,
20
Carbasa qua subitis non tumuere notis.
Litus in hesperium lentos ad pectora remos
Dum refero, gracili per vada lintre vehor,
Et freta dum ferio tremulo salientia motu,
Litoreae furtim destituuntur aquae;
25
Cernitur et nusquam tellus, sed pontus et aer;
Iam medios fluctus cymbula nostra secat.
Remigio patres mihi nunc succurrite fesso,
Namque salutiferam ferre potestis opem;
Lintea vestra peto; nostrae concedite puppi
30
Vela, quibus valeat scindere tuta salum:
Publicus officium tribuit mihi calculus, et me
Gymnasium scribam ferrariense tulit.
Scriba notat fidis quinquennia tempora chartis,
Aeraque quot iusto tempore lector habet;
35
Publicus illa solet tabularius acta notare,
Legitimam testes quom tribuere fidem;
Non mihi tanta licet privato ferre tabellis,
Legibus arbitrium quod mihi tale deest;
Arbitrium mihi tale patres date, deprecor, ultro,
40
Illud erit nostrae carbasus una rati,
Illud erit cunctis latissima ianua semper
Officiis, operi portus et aura meo:
Quod mihi si dabitis, venerando nomine patres,
Ipse diu vobis officiosus ero;
45
Dumque renascetur Titan, dum menstrua caelo
Luna pererrato mense bicornis erit,
Vestra triumphabit sincero nomine fama
Et memor accepti muneris huius ero.
Res est magna quidem, tenui sed maxima collo,
50
Invalidum tento sumere curvus onus;
Sarcina debilibus nostris onerosa lacertis,
Lassavit quotiens fortia terga virum;
Sed tamen assiduo teritur sub verbere marmor,
Fretus et hoc oneri colla premenda dabo;
55
Venimus huc seri, sed nostris herbida campis
Forsan abundanti fenore messis erit;
Saepe seges tardo fit semine fertilis orta,
Saepe colorato semita flore viret.