Daniel Finus celeberrimo poetae Lodovico Pictorio
Publica Pictori culpare negotia possem,
Si rescripta tibi sera tabella venit;
Vnica causa tamen, cunctisque valentior haec est:
Intermissa diu Calliopea fuit:
5
Mox revocata silet, scabra rubigine torpens
Nil nisi fert blaesos extenuata modos.
Hinc vereor vatem quemvis, velut anser holorem
Hac ego desueta raucus adire chely.
Si tua laudavi celeberrima carmina vates,
10
Non ea plus iusto celsa sub astra tuli;
Sic meritis quotiens extollo laudibus illa,
Non amor obducit lumina nostra tuus;
Vndique, si nescis, pictoria Musa probatur,
Sit procul a criticis dummodo livor edax.
15
Illa fugit Draucos, pathicos fugit illa cinaedos,
Congrua virtuti qualiacumque probat;
Penelope Hippolyto tetricisque Catonibus illa
Convenit, his spurcis munda Cupidinibus.
Pro lauro sacrum tibi iam diadema paravit
20
Viventi, extincto mox pia regna poli.