Antonio Tebaldeo carmina 18

Testo base di riferimento: S. Pasquazi, 1966

Cura dell'edizione digitale: M. Sartor; I. Tomei, 2022


Ad D. Nicolaum de Corrigia

 

Vidimus, armorum ductor, tua castra; cohortes

      Vidimus Herculeas Sfortiadumque manus.

Non tot per Phrygios fuerant tentoria campos,

      Maxima cum totas Graecia fudit opes.

5

Quis pedites equitesque canat? Quis dixerit hastas

      Mixtaque cum raucis tympana rauca tubis?

Vidi enses, vidi galeas, affixaque ramis

      Scuta virum, et textas fronde virente casas.

Quis referat tortas ardenti sulphure glandes?

10

      Fulmina non alio missa furore volant.

Telorum fuit omne genus: non tela Tonanti

      Tot fabricat Siculo claudus in orbe Faber.

Glans aluit quondam populos, nunc perdere coepit;

      Praebuit illa cibum, praebet at ista necem.

15

Vina bibit torvus plena cum casside miles,

      Membraque dat nudo pulverulenta solo.

Non ego mirabar Martem durosque labores

      In nostra cum sit durior arte labor.

Et mihi militia est, rigidi sum miles Amoris:

20

      O quantum a vestro milite noster abest!

Illic innumeri vitari cuspidis ictus

      Possunt, et forti tela retorta manu.

Irrita nulla volant superas hic tela per auras;

      Occulta veniunt spicula iacta manu.

25

Illic maesta canit belli tuba signa gerendi,

      Hic nulla canitur pugna gerenda tuba.

Illic horrisono revocant vos classica cantu,

      Hic nostros revocant classica nulla gradus.

Illic parte alia venientes cernitis hostes,

30

      Hic nulli in pugna cernitur hostis atrox.

Magna datur vobis merces pretiumque laboris:

      Nec merces, nec nos praemia digna manent.

Vere novo viridi tentoria tenditis agro,

      Frigora cum redeunt vos tenet alma quies.

35

Nos videt autumnus bellantes, nos videt aestas,

      Nos videt in medio frigida bruma gelu.

Parce tuos igitur nobis monstrare labores

      Magnaque militiae tollere facta tuae.