Ad Pontanum uuirum doctissimum
Qui legit aut nostros audit, Pontane, libellos
Miratur, laudat, tollit ad astra, stupet.
Nescio quid credam: mala carmina et optima laudant.
Iudicibus nostro tempore rara fides.
5
Decipimur stulti uerbis, et credimus omnes
Nobile Maeonii uincere uatis opus.
Dic age, de nostris quaenam sententia chartis
Sit tibi, qui uati dicere uera soles.
Si mea scripta probes, surgenti credere Famae
10
Incipiam, et uentis lintea tota dabo.
Sin minus, Aonios linquam te iudice fontes,
Et reddam clario plectra lyramque deo.
Pontano placuisse mihi laus magna futura est,
Pontano nec erit displicuisse pudor.