Iam medium Titan scandebat torridus orbem

Et lassos stimulabat equos, cum flebilis Harmon

Intravit gelidi sinuatum fornicis antrum.

Quem procul ex alto prospectans vertice Brunus

5

Speluncam celeri cursu devenit eandem,

Atque ait, "O superis descendens cantibus Harmon,

Quos crebra fecere novem vertigine caeli,

Argutam nunc tange chelyn quam doctus Apollo

Donat, et ipse suas monstrat non invidus artes.

10

Sed facilis resonetur amor; nam basia centum

Attica nunc tribuit redolenti mella labello

Panthea, me nitidis medium complexa lacertis.

Tange, nec optati differ modulamina plectri".

Harmon

Heu, mea nunc solito mens est aliena canore,

15

Et nova causa subest iustaeque inopina querelae.

En pecus infelix vix mucida vellera portat

Aegraque membra trahit macieque affecta suprema;

Invenit et nullo pascendam gramen in agro.

Conveniens curis modulandum est carmen amaris.

Brunus

20

Certe rumor erat Gallis vulgatus in agris

Quod tandem emeritus donati cultor agelli

Numine Caesareo fueras, viridique sub umbra

Dulcia permolli resonabas carmina voce.

Harmon

Heu, quam sunt isto distantia murmure facta.

25

Non leve sic folium summaeque moventur aristae

Mobile quam verbum est quod subdola Curia iactat,

Curia sollicitis non absona nomina curis

Iure gerens, blandis arridens Curia verbis.

Credula corda fovet ventosaque facta ministrat.

30

Conveniens curis modulandum est carmen amaris.

O ego vixissem patrio contentus agello

Nec factus proprio maior pede passus inesset,

Et steriles Musae, desertaque plectra fuissent,

Nam melior cura est simas pavisse capellas

35

Quam terere incertam per inania tempora vitam

Ridendisque manu muscis mansisse referta.

Conveniens curis modulandum est carmen amaris.

Quam mens laeva fuit, quam vanum pectus et excors,

Curia cum subiit pedibus fugienda citatis,

40

Vt fugit infernus sacratam spiritus undam.

A cane deluso documenta sequenda dabantur,

Ne peterem certis vanam pro carnibus umbram,

Quamvis maius erat visa sub imagine frustum.

Sed plena extremis fossa est et sensibus arvum.

45

Conveniens curis modulandum est carmen amaris.

Heu numquam rigidus fidisque monentibus asper

Exemplo sis, Brune, meo, ne vulnere turpi

Ipse cadas proprii percussus saepe ligonis.

Quam facile imprudens puteum delapsus in imum

50

Vix est difficili multoque labore retractus

A sapiente manu. Laudato ingentia tecta,

Exiguas habitato casas; nidoque relicto

Ne sis laudatam praeceps volitator ad urbem.

Muscosos iterum fontes silvasque comantes

55

Et lympham optabis per levia saxa fluentem.

Vertitur in longos grata est quae Curia luctus,

Inscia ceu volucris iactam cum viderit escam

Advolat, et laeto depascitur ore; dolosis

Mox laqueis deprensa gemit, sortemque priorem

60

Optat, et assiduis maeret sua fata querelis.

Conveniens curis modulandum est carmen amaris.

O proprie felix sorti quicumque quiescat

Nec nimias affectet opes miseraeque fugator

Ambitionis eat, popularis spretor et aurae,

65

Ponat inornatas simplex cui vilica mensas

Cum revocat serus sub nigra crepuscula Vesper,

Et dulcis coniunx, et circum pignora cara

Assideant passumque levent sermone laborem.

Conveniens curis modulandum est carmen amaris.

70

Credideram nummis seniores, Brune, parentes

Sustentare meis, sed mercenaria cogor

Vincla pati varias mundique errare per oras,

Vt spes frustratas multo sudore reponam,

Si modo cura potest vigiles operata labores

75

Amissam reparare diem. Quam fabula turpis

Heu fierem rediens Latios pannosus in agros.

Namque putat simplex nulloque expertus ab usu

Alliget ut pinguis Gallas lucanica vites.

Conveniens curis modulandum est carmen amaris.

Brunus

80

Cautior ipse meas per inhospita tesqua capellas

Semper agam, certos cantuque amplectar amores.

Sunt fugienda cito monstrata pericula cursu.