Cornelio Paolo Amalteo carmina, 16

Reference basis text: A. Benedetti, 1966-1969

Editing of the digital edition: S. Di Brazzano


16. ad peritissimum consultissimumque iuris doctorem
magnificum virum I. Fuxmag. Maximilliani Romanorum Regis
a secretis C. Pauli Amalthei Epigramma

Si ludo, Fuxmagge, tibi, qua fronte pudorem

      Nostrum, quis verbis, qua ratione tegam,

Quod tam nostra diu siluit non rustica Clio

      Et scio me veri criminis esse reum?

5

Si tamen admittis tenuis purgamina culpae:

      Commoditas Musis non fuit ulla meis.

Non laurus, undasve dei, non enthea vatis

      Pectora turbidulis suscipit Ister aquis.

Maecenas mihi nullus erat nec prodigus ore

10

      Pollio restituit arvula rapta mihi.

Ergo qui poteram turbato pectore sortem

      Et genus et mores commemorare tuos?

At cecini, dices, ad magni Caesaris urnam:

      Sic defectus olor morte premente canit.

15

Crede mihi, incultis sterilescunt vitibus uvae

      Nec segetes reddit non bene cultus ager.