40. Ad hospites de conuiuio comitis de Zoleren.
Qui tam lauta uides conuiuia, nobilis hospes,
Atriaque ornatis plena nitere uiris,
Mensa quod ignotas praebeat tibi digna uolucres
Et pelicanum fercula grata ferant,
5
Quod montes siluasque sedens modo dente pererres
Atque feras patinis quod canis unctus agat,
Desine mirari: Friderici industria tanta est
Qui meritis Zoleram tollit in astra domum.
Iste domi residens uolucres uenatur ad Indos,
10
Hic facit ut montes saxa nemusque uores.