Gerolamo Bologni Candidae libri tres 2, 40

Reference basis text: C. Griffante, 1993

Editing of the digital edition: Ketty Peruch


40. ad dominum Papiensem cardinalem

Haeserat invitae dudum sententia menti

      Linquere Pierias, numina vana, deas

Quaeque terunt studio vigilatum tempus inani

      Illecebris animos decipiuntque suis.

5

Quae vel Smyrnaeo condant fera proelia cantu

      Exiguum parcae nil nisi laudis habent

Cumque toga gelidos opus est quae vestiat artus

      Mense tremens iam nuda Thalia perit.

Publicus insolito torpentem frigore rumor

10

      Excitat et calamos sumere tempus ait.

Vnicus Aonidum Ticini praesul amator

      Ingeniis praestat munera larga bonis.

Cardineum celeber merita virtute cacumen

      Obtinet, innumeros cum dea caeca iuvet,

15

Divitiis alter Croesus, Cato pectore, sancta

      Longaevum superat qui probitate Numam.

Lux igitur lati nebulas clarissima mundi

      Pelle, suus doctis restituatur honos.

Diceris immensos studii sensisse labores

20

      Exemplum vulgi te decet esse rudis.

Te male vexatas decet instaurare Camenas,

      Nexia monstratum turba sequetur iter.

Sic tibi post Sixtum (quid enim felicius optem?)

      Pontifici plaudat maxima Roma suo.