8. ad Modestum

Quod nomen titulis novi sepulchri

Quinteri renovas tui, Modeste,

Rem facis, mihi crede, dignam amico,

Te dignam: quid enim fidesque amorque,

5

Quid, pars altera pectoris, sodales,

Si damus cineri ferenda cuncta,

Nec vivi nisi commodique amamur?

Hoc est pectoris ingenique amici,

Vbi olim quoque vivimus sepulti

10

Et nigris stat honos suus favillis.

Quare perge, Modeste, quaeso, perge,

Quem vivum modo amasti, amare ademptum,

Nec parce studiove sumptibusve,

Exemplum memori futurus aevo:

15

Nam qui non amat ossa, non amabat.