35. ad Amorem

Si coelum patria est, puer, beatum,

Si vere peperit Venus benigna,

Si nectar tibi Massicum ministrat,

Si sancta ambrosia est cibus petitus,

5

Quid noctes habitas diesque mecum?

Quid victum face supplicemque aduris?

Quid longam lacrimis sitim repellis?

Quid nostrae dape pasceris medullae?

O vere rabidum genus ferarum!

10

O domo Styge patriaque digne!

Iam levis sumus umbra: quid lacessis?