124. ad Aegidium Delphicum

Aegide Palladiae manus est armata Minervae;

      Tum vocat audaces in fera bella viros.

Aegide saxificis violenta Medusa capillis

      Cernitur, et diro sibilat angue caput.

5

Ergo dabunt haec monstra pio lacrymabile vati

      Nomen, et Aegidium fama maligna canet.

Nomen, Achymenio quod pagina tincta veneno,

      Quod notet inferno littera scripta lacu.

Sint procul a sacro fera Gorgonis ora poeta;

10

      Nec premat imbelles aegis iniqua manus.

Quique suo totiens celebravit carmine Delphos,

      Vivat felici Delphica dictus ave.