141. in Petrum Bargnanum

Lex iubet intonsos te linquere, Petre, ministros

      Quos facit esse tibi iam nova nupta viros.

Ecce, faces tremulae lucent et flammea sponsae

Ora tegunt, sacros fert puer ecce lacus.

5

Sparge nuces, Hymenaeus adest; es, Petre, maritus.

      Quid cessas? Putris sparge, marite, nuces.

Limine non presso thalamos Aurelia castos

Intrat. Io, zonam solvite virgineam,

Solvite, io, matres et saevae tela Dianae

10

      Linquite; nos Veneris dulcia furta movent.

Iam gravis es, iam vir; gratum est mihi, gratius esset

Si fieret dominus vir quoque, Lygde, tuus.