7. Ioanni Bordoniae

Vt nix Phoebeo durat glomerata sub axe,

      Vt navis scopulos quae ferit acta graves,

Vt quae leves plantae firmis radicibus haerent

      Cum tumidus madido sibilat ore Notus,

5

Vt signum media quod navita pingit harena,

      Turris ut irati fulmine tacta Iovis,

Vt casa pastoris quam percutit amnis ab alto

      Monte ruens rapidis insidiosus aquis,

Foemineus variae sub motu taliter aurae

10

      Durat amor, durant foedera, verba, fides.