75. de laudibus Sylviae
Francisco Bonallio

Sit coeli virtus, sint sydera fortia quamvis

      Et valeant vires sanguinis atque loci.

Strenuus hinc quis sit fortis, probus atque beatus

      Fortior est tamen his imperiosus Amor.

5

Infortunato nam Sylvia nata sub astro,

      Scorpius ardentes cum tenet acer equos,

Vallibus in mediis duro generata subulco,

      Inter equas recubans semper et inter oves,

Compositis loquitur verbis et murmure blando,

10

      Rustica nihil durae rusticitatis habet.

Incessu graditur lento, risuque modesto,

      Aemula purpureis floribus, ora movet.

Naturam coeli motus geminosque parentes

      Sanguinis atque loci nobilitavit Amor.