49. leonem feras alias parvipendere

Quid cristatus agit sinuosa volumina serpens?

      Sibilat et saevo cur lupa dente fremit?

Lustra ferae subeant omnes, leo nam ferus ille

      Qui maris et terrae regna superba tenet,

5

Ore vomit flammas et acuto fulminat ungue,

      Ferrea letali spicula dente secat.

Adde quod et solem stabili sibi foedere iunxit

      Cuius luce nitens lumina quaeque fugat,

Oppositos stringens oculos inimicaque regnis

10

      Obscurans radii regna calore sui.

Sed quid plura? Fero virtus sub dente leonis

      Quaeque cadit, solis cum micat igne sui.