Qui prius horrisona geminarat sibila uoce

      Anguis: et elato fuderat ore minas:

Eque suis totum uotis concaeperat orbem

      Vertere: et hadriacum subruere imperium:

5

En miser ad primos: galli fortisque leonis

      Tabuit aspectus: arma nec ulla mouet.

Iam mutilus: caudaeque extrema truncus ab ora

      Obstupet: et bellis quaerit abesse procul:

Tam cito? quid mirum? setosum hinc conspicit ursum

10

      In se fulminea tela mouere manu:

Cui gemini assistunt: Veneti praeclara senatus

      Lumina: diuino pectore: et ore: duces.

Hinc cristatus adest Gallus fera praelia miscens:

      Vix potis est tantis ipse patere malis.

15

Quid socii? Caesarque potens cum teutone fido:

      Et qui sarmaticos ducit in arma truces?

Alter: ubi est galli perterritus unguibus: haesit:

      Heu solita cupiens posse quiete frui.

Alter: ubi instantem: obsessa iam classe: leonem

20

      Sensit: iners ausis statque: doletque suis.

Quid faciat? non ulla potest auferre periclo

      Fors miserum? aut lapsis addere rebus opem?

Vna potest: anguis si se: de more: sub antro

      Occulat ignoto: quo uia nulla ferat:

25

Linquat et insubrum regnum melioribus: unde

      Cedere uel nolens cogitur ille breui.

Nam Iouis aetherii iustissima dextra tyrannos

      Atque hominum fastus non sinit ire diu.

Sforcia militibus nuper Lotouicus et auro

30

      Imperio sociis ingenioque potens:

Pulsus: inops: errans: aliena per oppida uictum

      Quaerit: et est summo trusus ab orbe rotae:

Et merito: fuit in superos hominesque superbus:

      Perfidus: et nulla non pietate carens.

35

Exilia: et cedes: iniusta edicta: rapinae:

      Huc miserum e tanto deposuere gradu:

Hoc scelus: hanc pestem: insubrum disiecit ab urbe

      Hadriacus (gallo concomitante) leo.

Discite: qui populos ditione tenetis et urbes

40

      Humanum uobis conciliare gregem:

Iusticiam colite: et mores seruate modestos.

      Rex erit is: populi quem tolerabit amor.