7a. Ad Magnificum Annibalem Bentivolum Philippi Beroaldi carmen

O decus eximium et gentis generosa propago

      Bentivolae, o patriae dulcis alumne tue,

Hunc cape tranquillo vultu facieque libellum,

      Annibal, et nugas perlege quaeso meas.

5

Fabula Tancredi mesta est, Boccatius auctor:

      Hanc nos Romano vertimus eloquio;

Hanc tu vulgato, lege tu sermone Latino,

      Atque animum alterna cognitione fove.

Illa suo candore placet, sed nostra placebit

10

      Si fuerit genio grata Camena tuo.

Sunt hec parva quidem, fateor, sed magna subinde

      Esse solent parvis deteriora bonis.

Hoc adamas gemmaeque docent, quae corpore parvo

      Oblectant reges divitibusque placent.

15

Nos contra horremus magnos persepe gigantes,

      Terremur magnis sepe voluminibus.

Quod si non sordent istec leviora, dabuntur

      Mox maiora. Vale, spesque decusque meum.