24. ad Bartholomaeum Platinensem

Maeonios quid me cogis traducere cantus?

      Non est haec humeris sarcina danda meis,

Quem grai atque itali vix libavere poetae,

      Pieriae unde fluit lucidus humor aquae.

5

Carminibus nostris forsan dum ludimus ignes,

      Effugiet nigros nostra puella rogos,

Et forsan celebris tyrrhena per oppida curret

      Flametta, ardoris maxima flama mei.

Magnos magna decent, ego dicar lusor amoris,

10

      Tu referes grandi grandia verba lira.

Smirnaei melius divina poemata vatis

      Romano poteris ipse referre pede.