10. in celebratione archangeli Michaelis

Sydereae ductor, Michael venerande, cohortis,

      Hostiles nobis nunc procul arce minas,

Qui squamosa feri fodisti terga draconis,

      Assirium immites quem timuere manus;

5

Vna qui solus viginti in nocte phalangas

      Stravisti: leto tot tua dextra dedit.

Tu fortis fidusque, Deo Christoque rebellem

      Fudisti aetherea victor ab arce manum.

Militiam merito caeli tibi credidit omnem

10

      Ductoremque suis te Deus esse dedit.

Assis, dive, precor, Michael, venerabile numen:

      Dissice fallacis daemonis insidias,

Bellorumque omnem foelix compesce procellam,

      Vt detur nostro tempore pace frui.