32. operatio virtutis iocundior est quam vitiorum

Sit quamvis declive malum, sit blanda voluptas

      Peccatique patens et sit ubique via,

Virtutis tamen est longe iocundior usus,

      Et magis atque magis finis amoenus erit.

5

Angustus, fateor, callis virtutis ad astra

      Aspraque saxosum semita monstret iter.

At vacuae vitiis agitant quae gaudia mentes!

      Contra, peccati pectora foeda notis

Excruciant scelerum Furiae noctesque diesque;

10

      His nullas poenas aequiperare potes.

Te nunquam absolves, etiam te iudice; semper

      Criminis ipse tui testis et hostis eris.