24. contra eos qui volunt in hac vita
requiescere, ut eterne laborent in altera

Quisquis in hac (demens!) quaerit requiescere vita,

      Altera plena sibi vita laboris erit.

Currimus hac omnes, capiunt sed praemia pauci;

      Non hic desidiae est nequitiaeque locus.

5

Segnitiem nobis prohibet certamen et hostis

      Saevus et aeternae mortis ubique pavor.

Nos alacres reddat promissi gloria coeli,

      Quam Deus athletis, praemia certa, dabit.

Vel poenae aeternae vel dona aeterna dabuntur:

10

      Quem vitae istius terreat ergo labor?