86. ad Iulium

Sunt illinc tibi, Iuli, et hinc ministri,

Quales non tulit Ida Graeciaeque

Quicquid abluit undecunque pontus,

Et manes tamen integer, pudicus,

5

Tanquam sis gelidus senex et inter

Tithonos Priamosque Nestorasque.

Aut alter, puto, Tantalus sub undis

Vivis perpetuo siticulosus

Et mus in medio horreo esuritor,

10

Aut es Hippolytus pudiciorque

Si quisquam Hippolyto fuisse fertur,

Cum peccare queas minusque pecces.