122. in Ruffum
Abluis et pectis domini crispasque capillos
Et multa cirrum quemlibet arte locas;
Ac si forte aliquem violentior aura quiesve
Aut capitis tegmen moverit orbe suo,
5
Accurris solitaque illum statione reponis,
Et blande comis sedulitate manus;
Nec minus attrectas steterint licet ordine crines
Compositosque velut compositurus adis;
Dumque aliquid quod agas semper vis, Ruffe, videri,
10
Nil agis et comptas comis inepte comas.
Quid faceres calvi fieres si forte minister
Quem tu non posses comere et abluere?
Vt puto candiculis ablegareris equorum,
Pectendisque iubis arbiter ad stabulum.