Naldo Naldi epigrammaton liber, 187

Testo base di riferimento: A. Perosa, 1943

Cura dell'edizione digitale: M. Rossi


187. Laurentio Medici viro clarissimo atque patri patriae

Quam sapis, o Medices, licet hinc spectare volenti,

      Inque tuam patriam sit tibi quantus amor:

Nam, cum perspicias longos hanc semper in annos

      Victuram fato cedere nolle gravi,

5

Vt data sit nato facis Alfonsina merenti -

      Sponsa quidem tanto facta beata viro -,

Tot nova progenies ut suffectura nepotes

      Sit modo, quot nunquam deterat ulla dies,

Munera qui teneant ita publica tempus in omne,

10

      Quique regant urbes qualibet arte suas,

Vt, domus in Latios quod Iulia contulit olim,

      Protinus imperii causa futura novi,

Hoc domus in Tuscos Medicum ferat optima cives,

      Augeat et patrios, auxit ut ante, Lares.