Naldo Naldi epigrammaton liber, 32

Testo base di riferimento: A. Perosa, 1943

Cura dell'edizione digitale: M. Rossi


32. ad Bernardum Bembum legatum Venetum
de carminibus a se in Iulianum Medicen conscriptis

Cum miranda forent quae maxima Ianus in armis

      Gessit et integram non habitura fidem,

Carmina mitto tibi, quibus haec memoramus in aevum

      Singula, quae Medico sint bene gesta duce,

5

Vt, quantum fidei gestis praestantia rerum

      Eripit et vero quaeque minora facit,

Tantum voce tua, gravior cum testis adesses,

      Omnibus his valeas addere, Bembe, fidem.

Rebus enim cunctis praesens cum forte fuisses,

10

      Legatus Veneta missus ab urbe, pater,

Atque prior fieres podio spectator ab alto

      Quae Tusci duro bella tridente gerant,

Qualis et ornatus Medici, quae pompa subesset,

      Vt nisi qui vidit credere ficta queat,

15

Est tua quae gravitas possit ea gesta referre,

      Maxima, Bembe, licet, vera fuisse tamen.

Nemoque tam sancto te quicquam teste negabit,

      Haec putet at numeris vera fuisse tuis.