21. de morte Contessinae infantis, Laurentii Medicis filiae

Audissem natae fatum cum moestus acerbum

      Atque domum peterem tristior inde tuam,

Illius, o Medices, nota mihi maior imago,

      Limine subsistens, talia voce dedit:

5

Quod tibi querenti fuerat dicturus Apollo,

      Hoc ego, Nalde, tibi nunc, dea facta, canam.

Instaret nobis aliquid cum triste futurum

      Idque ratum faceret Parca maligna nimis,

Iupiter ingemuit Medicam vi laedier ulla

10

      Progeniem, cuius maximus auctor erat.

Cum tamen obstarent contra luctantia fata,

      Nil quibus invitis Iupiter ipse potest,

Quod fuit, obtinuit, levius pro tempore dannum:

      Vt caderem saevae facta rapina neci,

15

Tot pater at magnus venerandaque mater in annos

      Viveret, ut natos cernat uterque senes.

Dixit, et in verbo torquens vestigia: Patri,

      Nalde, velim referas haec mea dicta. Vale!