Naldo Naldi elegiae ad Laurentium Medicen 3, 27

Reference basis text: L. Juhász, 1934

Editing of the digital edition: F. Boschetti


27. ad Laurentium Medicen de legatione
sua ad pontificem maximum

Qui petis auspiciis Romam maioribus urbem,

      I, Medices, patrios defer in astra Lares,

I modo, sed nostri nusquam tibi cura recedat,

      Sic, quodcunque velis, dent pia fata tibi,

5

Nam, nisi prospicias, veluti cupis, optime, nobis,

      Ni tuus aeternum nos tueatur amor,

Non queat aut quisquam nostrum bene fungier aura,

      Non queat aut rebus consuluisse suis.