20. ad Phoebum
Si, quae Cassandrae spiraras, Phoebe, canenti
Iussisti certa verba carere fide,
Supplicium sceleri dignum solvisse nefando
Hanc reor et poenas exhibuisse graves.
5
Cum neque Cassandram monitis privasse deorum
Te rear, extiterit causa quod ipsa levis,
Non tu turpis amans, ut mendax fabula dictat,
Contentus Daphne, Phoebe pudice, tua,
Sed tua quod nimium demens oracula tempsit,
10
Dum male credendum, quod canis, esse putat.
At me, qui semper colui tua numina ducens
Omnia praeceptis inferiora tuis,
Cur simili poena me damnas, Phoebe, canendis
Cum data carminibus sit mihi nulla fides.
15
Parce, precor, nam, si, qui nunc tua verba refundunt,
His hominum fuerit credula turba minus,
Et tua cessabunt monitis oracla futuris,
Nec deus, ut quondam, verior unus eris.