16. ad Antonium Tridentonem

Quam bene conveniunt, Musarum magne sacerdos,

      Prisca Tridentonum nomina clara tibi.

Nam, velut aequoreas Neptunus temperat undas

      Vtque tridente suo commovet acer aquas,

5

Sic quoque tu seu vis aegros, divine Tridento,

      Mortales dulci detinuisse lyra

Seu cupis hos rursus numeris impellere ad aestus

      Mentis et ad tristes acrior inde minas.

Id facis egregie; sic, quod deus ille tridenti,

10

      Docte Tridento, potest, tu potes ingenio.