21. ad Laurentium Strozam
de Mariettae sororis laudibus
Huc, precor, huc venias nitidis, intonse, capillis,
Huc, age, virgineas pectine finge comas,
Pallantis canitur Strozae dum candida proles,
Huc ades aurata, pulcher Apollo, lyra!
5
Non minor hic labor est, quam si tua facta referrem,
Niterer aut laudes enumerare tuas.
Nanque ita formosos fulget Laurentius inter
Editus in Stroza nobilitate puer,
Vt tibi persimilis facie videatur et ore,
10
Dignus ut aethereos, ductitet unus equos.
Nam, tibi si flavi pendent a fronte capilli,
Si premit auratas laurus amata comas,
Hic pariter niveos enutrit vertice crines,
Mox premet auricomum fronde virente caput.
15
Si mulcet cithara Phoebus quaecunque canora
Producens numeris quaeque creanda suis,
Te quoque fama volat, Laurenti edocte, canendis
Versibus Aonios tot didicisse modos,
Vt possis, veniet cum mox tibi saevior aetas,
20
Flectere vel numeris corda superba tuis.
Macte, puer, virtute tua, sic ibis ad astra,
Sic puer illustres exuperabis avos.
Nam si divino non es de semine natus
Neve potes patrem sorte referre Iovem,
25
At possis geminos etiam memorare parentes,
Aequent ut magnos nobilitate viros.
Inde nepos cum sis equitis Pallantis avitae,
Nil est, quo sorti praeposuisse velis.
Fac tamen, haec desint; felix virtute sororis
30
Et felix forma tu potes esse tuae.
Ah, quotiens vidi, peteret cum templa deorum
Inter matronas casta puella pias,
Viseret ut cupide populum concurrere Tuscum,
Vndique per stratas dum ruit ille vias.
35
Et vidi egregia te tantum, Strozia, forma
Divina patrias sorte praeire nurus,
Idalias quantum praestat Venus aurea matres
Aut nymphas quantum Cynthia pulchra suas.
Te quoque praecedens sese tulit ante Cupido
40
Telaque nunc torquens nunc quatiensque faces.
Inde quot in miseros, heu, spicula iecit amantes,
Dum loca cuncta iubet, diva, patere tibi,
Dum facit, ut plebs ipsa frequens tibi cedat eunti,
Dum populi cuneos dividit ille graves?
45
Illinc longa mora est, iuvenes quot fecit amare,
Dicere, quot senibus vulnera cruda dedit.
Hunc rapit auratus pendens a fronte capillus
Et quas innodat candida victa comas.
Hic stupet ardentes nimis admiratus ocellos,
50
Qui possint geminos vincere Luciferos.
Candidulas videt ille genas rapiturque videndo
Datque Cupidineo colla premenda iugo.
Inde vir est si quis, dentes qui spectet eburnos,
Miratur, lapides ut superent Parios,
55
Sic Florentini pariter iuvenesque senesque
Laudibus invigilant, Strozia pulchra, tuis
Neve tuam tantum mirantur, candida, formam,
Illa satis quamvis causa furoris erat,
Quam mores castos laudant vitamque pudicam,
60
Qua nuribus Tuscis tendis in astra prior.
Iure quidem, nam tu superam, Marietta, Dianam
Moribus et forma sola referre potes,
Nunc velut ipse potest imitatus numina Phoebi
Frater Apollineum fronte referre decus.
65
Ite igitur tantis insignes laudibus ambo,
Pergite, divinas sumat uterque vices,
Vt, Titan veluti splendens, velut aurea Phoebe
Stelliferi superant caetera signa poli,
Vos ita mortales reliquos superetis honore,
70
Sitis et ut Strozae lumina bina domus.