25. ad Stellam

Ferrum Hebrus, ferrum Thybris colit acer et ingens

      Euphrates, ferrum Rhenus et Ister amant;

At pace Eridanus gaudet studiosus amantum,

      Et thalami et pacis munia lenis obit.

5

Eridano pia vota pii reddamus amantes,

      Fumet odoratis ara verenda focis.

Tu vero, mea lux, (etenim tibi cultus Amoris

      Tantus inest) aris debita solve sacris,

Eridano benedic detectis compta papillis,

10

      Compta sinu, pexis non sine lege comis;

Mox Genio da thura, facesque incende sabaeas,

      Et mihi delicias, nocte ineunte, para.