2. libelli trepidatio subeuntis principis aulam
Saepe licet noster tentaverit ante libellus
Guidonis celebres velle subire domos,
Saepe licet tulerit gressus ad liminis usque
Intrepidus metas attigeritque fores;
5
Cum tamen aspexit nitidis exculta columnis
Atria, digna sacro non nisi rege coli,
Auratasque trabes, variis et marmora circum
Viva modis, veterum sculptaque busta manu,
Intus et egregios vidit clarosque poetas
10
Et loca facundis omnia plena viris,
Vsque oculos adeo praestrinxit splendor ab alto
Defluus, atque ingens induit ora pudor,
Vt, maiestati potis haud subsistere tantae,
Extiterit, timidus rettuleritque pedes.
15
Sed tandem fretus mansueti principis aula,
Ecce, licet pavidus, regia tecta petit.