1.
Divus in hoc tegitur Nicolaus marchio saxo
Et patriae dominus et pater ipse suae.
Estensem hunc rapuit gemuitque insubria tellus
Totaque gens Ligurum cum duce maesta suo.
5
Adria percussis sonuit super aethera palmis
Ipsa suo vidua principe terra pio.
Non Italis solum sed quolibet orbe profectis
Quaesitus pacis unicus auctor erat.
2.
Hic ubi functus obit Nicolaus luce suprema
Estensis iussit viscera clausa tegi,
Maestior at domini sepelit Ferraria corpus,
Cum quo omnis Ligurum ferme sepulta salus.
5
Vna eadem ad superos meritis melioribus illum
Spemque suam populis abstulit hora brevis.
Iam senio tardante gravi, quaeque optima mors est,
Defunctum gemuit tristis utrinque Padus.
Neve absit totus quae se dilexerat urbi,
10
Quae dederat vivens interiora dedit.