Rev.mo et Clar.mo sacri eloquii oratori fratri Ioachin Beccariae, nec non haereticae pravitatis inquisitori

Inclyta lux Ioachin fidei celeberrime nostrae,

      Divini cultus terribilisque tuba,

Non audita prius suggesto percinis alto,

      Ad te praeproperum turba capessit iter.

5

Non capit astantum latum tot milia templum,

      Crureque crus premitur pes pede virque viro.

Nos quoque et hinc illuc impellimur agmine denso,

      Quandoquidem nobis cinxit utrumque latus.

Admiranda tuis tanta est facundia verbis,

10

      Te putet ut populus caelitus illa loqui;

Excidium quom tu praesagis, contio vulgat,

      Praescius haec sancti Pneumatis ore canit:

Vidimus innumeram decies deflere catervam,

      Eloquio lacrimas eliciente tuo.

15

Plurima dissolvens antiquae aenigmata legis,

      Assimilas legi singula verba novae!

Pluraque Caesareo suffulcis codice dicta,

      Plurima pontificum robore dicta probas;

Foedifragus, latro, sicarius, improbus, ultor,

20

      Sacrilegus, leno, fur, homicida gemit;

Vipereum virus blasfemus, et aleo talos

      Donaque falsidicus testis opima fugat;

Terrificisque minis peccator territus astans

      Exuit admissum protinus omne tuis,

25

Comprimit et fastus inflatior utre superbus,

      Quod tulit elatum, fert modo mite caput;

Invidus obliquo per te non lumine cernit

      Quicquid felices prosperitatis habent.

Sanguinis effrenos furibundus mitigat aestus,

30

      Mendicis large tradit avarus opes;

Per te longa domant parco ieiunia victu,

      Mensa quibus lautos praebuit uncta cibos;

Nullus adulteriis, stupris, incoestibus ardet,

      Impiger est qui iam desidiosus erat;

35

Adde, quod implicitum scelerum molimine mundas,

      Sidera quodque poli, te duce, mundus adit;

Te duce, quin etiam monstratur semita caeli;

      Te duce caelicolum regia celsa patet:

Antiquae flagrans abolere piacula noxae,

40

      Christus pro nobis in cruce fixus obit;

Quilibet hunc a te monitus sitibundus adorat,

      Stratus et hunc, pura mente, precatur humi.

Post ter quingenos, et post ter quinque secundus

      Annus adest, Martis primaque mense dies,

45

Congeris unanimi quom tu consortia coetu,

      Suffixum ut valeant conciliare Deum.

Sunt tamen haec hominum bis quinque ad milia per te

      Ante quater denum multiplicata diem.

Sis felix Ioachin, Ticini gloria magni,

50

      O, tibi felici gratia quanta subest.

Agmina si Turcam debellatura superbum

      Congereres iussu sedis Apostolicae,

Tot congesta forent per te divinitus arma

      Tam subito, haud coeptum fama putaret opus,

55

Quae Maometei frenarent sceptra tyranni,

      Sultani quondam regna, sophisque minas.

Di tibi dent annos, servent te numina terris,

      Christicolis lampas praemia vivus eris.