Dum in castris esset

Linquere quid volui Venerem mollesque puellas?

      Quid volui demens bella cruenta sequi?

Quid volui pacem placidasque relinquere Musas,

      Dum potui patria vivere tutus humo?

5

Stridentes inter lituos strepitusque tubarum

      Incultos meditor voce tremente modos.

Nec mihi respondent Musae nec doctus Apollo;

      Nec veniunt solito carmina ducta pede.

Carmen amat pacem, bella hic furibunda geruntur;

10

      Pierides timidas cornua pulsa fugant.

Non hic pegaseas undas dulcesque liquores

      Nec datur Aonii sumere fontis aquas.

Quas rota turbavit currus, quas rana frequentat,

      Hic pleno virides ore bibuntur aquae.

15

Non hic sufulti Libycis stant dentibus orbes;

      Cespitibus duris mensa parata mihi est.

Ista tamen toleranda forent, sed corpus in herba

      Languidaque in foeno ponere membra grave est.

Non hic pluma notat vestes mollesque capillos;

20

      Ponimus in duro corpora fessa solo.

Est mihi pro lecto tellus, pro tegmine caelum:

      Annumero picti sidera saepe poli.

Nocte sub obscura pluvias nimbosus Orion

      Mittit et aethereas eiaculatur aquas.

25

Hinc Notus, hinc gelidus Boreas fera proelia miscent,

      Ardet et irati regia tota Iovis.

Sed cum clara fugat nigras aurora tenebras

      Et revehit nitido Cynthius axe diem,

Tum sopor irriguus mea membra gravata relinquit;

30

      Invenio madidos anxius ipse pedes.

Hinc subeunt febres intrantque in viscera morbi,

      Hinc properat celeri mors inopina gradu.

Quam fuerat melius caros habitare Penates

      Et tutum in propria consenuisse domo

35

Et placidos inter vates tenerasque puellas

      Securus caeci scribere furta dei!

Quid me castra iuvant Martis? Quid bella? Quid enses?

      Conveniunt manibus plectra sonora meis.

Quam timeo ne, dum tenues glans igne per auras

40

      Acta ruit, flammis pectora nostra petat!

Aut cum torta volant validis vaga tela lacertis

      Transfigant ictu viscera nostra gravi!

Quo fugiam? Poterone inter tot vivere casus?

      An repetam patriae dulcia tecta meae?

45

Hinc ego sollicitus venturos auguror hostes;

      Hinc mihi non parvi causa timoris amor.

Mille mihi laqueos, fabricavit mille Cupido

      Retia; mille mihi vincla paravit Amor.

Ah miser iratum qui linquere tentat amorem;

50

      Vincla recusanti saevior instat Amor.

Patria tecta petam; parcet mihi forte Cupido;

      Peccanti placidus saepe pepercit Amor.

Iam, Nicolae, vale, nostrorum causa laborum;

      Te teneat Mavors, me vocat alma Venus.