Io. Fran.co Pico Concordiae Comiti

Pierium ductore cupis me nare per aequor

      Et dare Pegaseis carbasa docta notis.

Ah mihi sunt fragiles remi tabulaeque fatiscunt:

      Ah mea tam vastum non capit alnus onus.

5

Aptius ad rapidas sinuosi Phasidos undas,

      Argoos veherem per freta longa duces.

Littoraque Aegides citius cretea Parisque

      Tangere Amycleam me duce posset humum.

Iam primus Naxon me vela regente Lyaeus

10

      Non formidatis adveheretur aquis.

Doctior est generose Puer tibi nauta petendus

      Et compacta ratis commodiore pice.

Nec tibi quaerendus libycos est ille per aestus,

      Non per achamenios pannosiosque truces,

15

Non per hyperboreas hiemes Rhodanumque rapacem,

      Nec qua septena Nilus oberrat aqua.

Ille tuae est Francisce domi pulcherrime Tiphys:

      In patria rector maximus ille tua est.

Ille tibi est arcta consanguinitate propinquus,

20

      Picus apollineae gloria prima ratis.

Hoc pete secura ducente ceraunia pinu

      Tristeque scylleis quod mare latrat aquis.

Huius in antennis resident hinc Euhius, illinc

      Cynthius et Maia suppara natus habet.

25

Puppe sedet Clio proraque Thalia moratur,

      Inflat anhelantes Calliopea sinus.

Vrania speculatur iter, Polyhymnia cautes

      Vitat et Euterpe stuppea vincla tenet.

Ducentes Erato validas ad pectora tonsas

30

      Hortatur, remos Terpsichorea levat.

Melpomene per transtra volans cerealia fessis

      Porrigit et larga bacchica dona manu.

Quo libet undisonum felices ite per aequor:

      Hic per stagnantes sit mihi cursus aquas.

35

Quod si me optatis comitem, vestigia pone

      Vestra legens cymbae nauta sequentis ero.