Ecce ancilla Domini,

Quam Pater ipse omnipotens

Elegit ante saecula

Quietum tabernaculum.

5

Ecce cui sacras nuptias

Fortis indixit angelus,

Ecce quam sanctus Spiritus

Alto replevit numine.

Ecce virgo concipiens

10

Intacta Dei genetrix,

Ecce iessaea virgula

De qua flos pulcher emicat.

Huc huc omnes accurite

Emanuelem visere,

15

Quem iacentem praesepio

Bos adorant et asinus.

Cuius natali iubilant

Celsi regis exercitus,

Et magnum nocte gaudium

20

Adnuntiant pastoribus.

Videte stellam praeviam

Sanctis eois regibus,

Qui vagienti domino

Aurum myrrham thus obferunt.

25

Heu, iam tenellum sanguinem

Fundit ex lege veteri,

Dum Symeonis gremio

Desideratus incubat.

Videte matrem virginem,

30

Heroidis metu pavidam,

Latentem cum filiolo

Aegypti regionibus.

Cernite mox sollicitam,

Dum puer templo disputat;

35

Cernite rursus hilarem,

Dum sacras replet hydrias.

Spectate miserabilem,

De cruce nati pendulam,

Commendatam discipulo,

40

Cor soevo fixam gladio.

Videte tandem radiis

Magna vincentem sidera,

Vndantem plena gratia,

Splendentem clara gloria.

45

Regina coeli maxima,

Sanctissima, pulcherrima,

Sustenta tuos servulos,

Defende tuum populum.