Endecasyllabon ad maximum antistitem dominum Petrum Colocensem

I, dextro pede sidere et secundo

Felix Pannoniam petas, aselle.

Te non aspera saxa, non viarum

Scruppi, flumina, cespites, lacunae,

5

Clivorum salebrosa senticeta

Delassent: iter hoc laboriosum

Transcurras sine claudicatione.

Commentaria nostra sarcinasque

Perfer naviter offerasque munus

10

Petro pontifici pio eloquenti,

Quo nil doctius elegantiusque,

Quo nil sanctius est benigniusque.

Is te comiter obvioque gressu

Gratanter capiet, statim refectum

15

Vnguento, ambrosia, toro fovebit.

Tunc molli satur educatione

Fies delicium tui patroni

Gustabisque rosas, eris torosus

Splendens floridus aureusque asellus.

20

I, dextro pede sidere et secundo

Felix Pannoniam petas, aselle.