Epigramma ad Petrum Bonum citharedum

Iam cedat Thamyras, iam Methymneus Arion,

      Cedant Threiiciae plectra canora lyrae;

Cedat et Amphion Dirceus, cedat Olympus

      Et Timotei docta Linique chelis,

5

Et cum Terpandro cedat crinitus Ioppas

      Blandaque Chironis barbyta nubigenae;

Cedat et Archadicus deus et Patareus Apollo

      Et lyrici vates Thespiadumque chorus:

En cytharedus adest aevi nova gloria nostri,

10

      Petrus cognomen ex bonitate trahens.

Hic celeri dulces percurrit pollice nervos

      Et movet artifici mobilitate manus;

Exprimit hic fidibus resonantia verba canoris:

      Est testudo loquax huius in arbitrio.

15

Perstringunt acies oculorum et lumina fallunt

      Petri docta manus articulique leves.

Hunc post fata volet summi regnator Olympi,

      Hunc volet infernus Tartareusque pater.

O Bone ter foelix, qui post tua fata Tonantis

20

      Aut Iovis Elysii qui cytharedus eris!