Tumulus Lucilii Pontani.
vixit dies quinquaginta.
Praefica loquitur, puellae respondent

Praefica

Infanti lacrimam ad tumulos floremque, puellae,

      Spargite, nam et vestro est dignus honore rogus.

Puellae

En flores, nardum ad tumulos balanumque liquamus;

      Ipsa etiam lacrimae sponte per ora fluunt.

Praefica

5

Nil infans ore infanti vix vagit; at ipsae

      Munera vestra piis sedulae obite modis.

Puellae

Lucili, tibi lux nomen dedit et dedit ipsa

      Mater Stella tibi, stellaque luxque simul;

Eripuit nox atra, nigrae eripuere tenebrae.

10

      Vixisti vix quot litera prima notat.

Hosne dies? Breve tamne tibi lux fulxit? Et aurae

      Maternum in nimbis sic tenuere iubar?

Infelix fatum, puer heu male felix; heu, qui

      Nec puer es, nec lux; nec, nisi inane, quid es?

Praefica

15

Sit vobis ver perpetuum ac sine nube, puellae;

      Lucilii et cineri spiret inustus odor.