Tumulus Petri compatris iucundissimi poetae.
ipse et Viator colloquuntur

Petrus

Dic tumulo pia verba; feres pretium; iacet hic, qui

      Nec sensit lites iurgiave ulla domi.

Viator

Macte vir ingenio, spiret ver, floreat urna,

      Dent pacem et cineri numina: da pretium.

Petrus

5

Do pretium: fuge vincla tori, fuge iura mariti;

      Non tibi erunt lites iurgiave ulla domi.

Viator

Ducta est, coniugium subii: succurre marito.

Petrus

      Ducta est Parthenope si tibi, vive Senis.

Viator

Macte, iterum tibi ver spiret, tibi floreat urna,

10

      Et pascant manes attica mella tuos.

Petrus

Compater hanc legem statuit: connubia vita;

      Connubiis nanque est addita rixa comes.