carmina libraria Sebastianus Munster, cosmographiae universalis libri VI

Permalink: http://www.poetiditalia.it/texts/CARM_LIB|muns|001


ad lectorem pro historiae commendatione Glareani carmen

Si quid in hoc mundo quod mortales iuvat omnes

      Historia est uno non celebranda modo.

Historiae nostrae iustissima regula vitae,

      Historiae debet quicquid in orbe viget.

5

Historiam cognosse iuvat, didicisse iuvabit

      Dum rigido Arctoo fulmen ab axe ruit.

Corniger arcano quaedam volumina Moses

      Tradidit et quicquid Biblia sacra tenent.

Historia est Evangelium, sacra dogmata Pauli

10

      Quaeque ab Apostolis sunt semel acta viris.

Huic, ergo huic uni invigiles prudenter oportet

      Care puer quisquis tendis ad astra viam.

Huic totum te dede puer, caelestia quondam

      Praemia laturus perpetuumque decus.

 

ad clarissimum virum Dominum Sebastianum Munsterum F.V.

 

Vidimus historiam,et rerum pandecta tuarum

Quibus nihil nec amplius nec doctius.

Haec aetas habuit Musis et Apolline dignum

Longisque vix videbitur post saeculis.

5

Felix qui possit tantarum pondera rerum,

Tot principes, tot orbis ingentes duces,

Urbes tot, populos modicis includere chartis:

Adeo nihil fatiscit ingens illa vis.

Ingenii mentisque vigor et cura futuri

10

Et nomen immortalitatis arduae.

Fortunate senex: numquam tua grandia scripta,

Munstere, delebunt Nepotes posteri,

Cum famam superes, quae te bene grata sepultum

A lividis malisque linguis eximet.

15

Ergo si quod habes vegetum sub corde senili

Robur micatque luminis fomes sacri,

Confice quod superest. Modici est tibi meta laboris

Et orbis hoc munus novum desideras.