carmina libraria Ioannes Bauhin, de plantis a divis sanctisve nomen habentibus

Permalink: http://www.poetiditalia.it/texts/CARM_LIB|bauh|001


Iohannes Bauhinus Lectori ex Horatio

 

Non qui Sydonio contendere callibus ostro

Nescit Aquinatem potantia vellera fucum

Certius accipiet damnum, propiusque medullis

Quam qui non poterit vero distinguere falsum.

5

Quod verum atque decens curo et rogo et omnis in hoc sum.

Ac ne forte roges quo me duce, quo lare tuter,

Nullius addictus iurare in verba magistri,

Quo me cumque rapit tempestas, deseror hospes.

Nunc agilis fio et mersor civilibus undis;

10

Virtutis verae custos rigidusque satelles

Nunc in Aristippi furtim praecepta relabor

Et mihi res, non me rebus submittere conor.

 

de libro D. Iohannis Bauhini Ioannis a Gilley Sequani epigramma

 

Pegaseo fugiunt homini sua tempora cursu,

      Cura sagax menti cognitionis inest.

Uberior variis est nulla scientia scriptis

      Quam quae aperit terrae cunctipotentis opes.

5

Haec opera edisces Bauhini, candide lector,

      Unus erit grandis Bibliotheca liber.

 

epigramma

 

Omnigenas pulchro complectitur ordine stirpes

      Iudicio excutiens quae mala nota gravi.

Gratia debetur tanto non parva labori,

      Huic tribues multi quod meruere simul.

 

aliud eiusdem

 

Non tot divitias peregrinus in omnibus errans

      (Crede mihi) terris aequoribusque feres.

Ac Bauhini operis tibi lectio sedula tradet,

      Quem complexa ulnis Pallas et docuit.

5

Planitiem nitidis quaecumque coloribus ornant

      Quae natura dedit montibus aeriis.

Nominibus distincta suis descripta figuris

      Omnis fecundus continet iste liber.

 

epigramma Iohannis Posthii Germeshemii Clarissimi Medici

 

Qualis erit quantusque fuit Rondletus in urbe

      Monspelia donec vivere fata dabant,

Talis erat tantusque fuit Gesnerus in urbe

      Helvetia, quisnam postmodo tantus erit?

5

Phoebus ad haec nostra succedet in urbe Iubertus

      Gesneri partes deinde Bohinus aget.