Boethius consolatio Philosophiae 5, 5

Testo base di riferimento: L. Bieler, 1984

Cura dell'edizione digitale: A. Agnesini, 2009

Inserimento e controllo dei dati: P. Galligani


5.

Quam uariis terras animalia permeant figuris!

Namque alia extento sunt corpore pulueremque uerrunt

Continuumque trahunt ui pectoris incitata sulcum;

Sunt quibus alarum leuitas uaga uerberetque uentos

5

Et liquido longi spatia aetheris enatet uolatu;

Haec pressisse solo uestigia gressibusque gaudent

Vel uirides campos transmittere uel subire siluas.

Quae uariis uideas licet omnia discrepare formis,

Prona tamen facies hebetes ualet ingrauare sensus;

10

Vnica gens hominum celsum leuat altius cacumen

Atque leuis recto stat corpore despicitque terras.

Haec, nisi terrenus male desipis, ammonet figura:

Qui recto caelum uultu petis exserisque frontem,

In sublime feras animum quoque, ne grauata pessum

15

Inferior sidat mens corpore celsius leuato.