Sidonius Apollinaris carmina 18

Reference basis text: A. Loyen, 1960

Editing of the digital edition: S. Condorelli, 2009


Si quis Auitacum dignaris uisere nostram,

      Non tibi displiceat: sic quod habes placeat.

Aemula Baiano tolluntur culmina cono

      Parque cothurnato uertice fulget apex.

5

Garrula Gauranis plus murmurat unda fluentis

      Contigui collis lapsa supercilio.

Lucrinum stagnum diues Campania nollet,

      Aequora si nostri cerneret illa lacus.

Illud puniceis ornatur litus echinis:

10

      Piscibus in nostris, hospes, utrumque uides.

Si libet et placido partiris gaudia corde,

      Quisquis ades, Baias tu facis hic animo.