Sidonius Apollinaris carmina 17

Reference basis text: A. Loyen, 1960

Editing of the digital edition: S. Condorelli, 2009


Quattuor ante dies quam lux Sextilis adusti

      Prima spiciferum proferat orbe caput,

Natalis nostris decimus sextusque coletur,

      Aduentu felix qui petit esse tuo.

5

Non tibi gemmatis ponentur prandia mensis,

      Assyrius murex nec tibi sigma dabit;

Nec per multiplices abaco splendente cauernas

      Argenti nigri pondera defodiam;

Nec scyphus hic dabitur rutilo cui forte metallo

10

      Crustatum stringat tortilis ansa latus.

Fercula sunt nobis mediocria, non ita facta

      Mensurae ut grandis suppleat ars pretium.

Non panes Libyca solitos flauescere Syrte

      Accipiet Galli rustica mensa tui.

15

Vina mihi non sunt Gazetica, Chia, Falerna

      Quaeque Sarepteno palmite missa bibas.

Pocula non hic sunt inlustria nomine pagi

      Quod posuit nostris ipse triumuir agris.

Tu tamen ut uenias petimus; dabit omnia Christus,

20

      Hic mihi qui patriam fecit amore tuo.