Claudianus carmina minora 18

Testo base di riferimento: J. B. Hall, 1985

Cura dell'edizione digitale: O. Fuoco, 2009


Aspice morigeras Rhodani torrentis alumnas

      Imperio nexas imperioque uagas,

Dissona quam uarios flectant ad murmura cursus

      Et certas adeant uoce regente uias.

5

Quamuis quaeque sibi nullis discurrat habenis

      Et pateant duro libera colla iugo,

Ceu constricta tamen seruit patiensque laborum

      Barbaricos docili concipit aure sonos.

Absentis longinqua ualent praecepta magistri

10

      Frenorumque uicem lingua uirilis agit.

Haec procul angustat sparsas spargitque coactas;

      Haec sistit rapidas, haec properare facit.

Laeua iubet? laeuo deducunt limite gressum.

      Mutauit strepitum? dexteriora petunt.

15

Nec uinclis famulae nec libertate feroces,

      Exutae laqueis, sub dicione tamen.

Incessuque pares et fuluis pellibus hirtae

      Esseda concordes multisonora trahunt.

Miraris si uoce feras pacauerit Orpheus,

20

      Cum pronas pecudes Gallica uerba regant?