Praefatio
Maior Scipiades, Italis qui solus ab oris
In proprium uertit Punica bella caput,
Non sine Pieriis exercuit artibus arma:
Semper erat uatum maxima cura duci.
5
Gaudet enim uirtus testes sibi iungere Musas;
Carmen amat quisquis carmine digna gerit.
Ergo seu patriis primaeuus manibus ultor
Subderet Hispanum legibus Oceanum,
Seu Tyrias certa fracturus cuspide uires
10
Inferret Libyco signa tremenda mari,
Haerebat doctus lateri castrisque solebat
Omnibus in medias Ennius ire tubas.
Illi post lituos pedites fauere canenti
Laudauitque noua caede cruentus eques.
15
Cumque triumpharet gemina Carthagine uicta
(Hanc uindex patri uicerat, hanc patriae),
Cum longi Libyam tandem post funera belli
Ante suas maestam cogeret ire rotas:
Aduexit reduces secum Victoria Musas
20
Et sertum uati Martia laurus erat.
Noster Scipiades Stilicho, quo concidit alter
Hannibal antiquo saeuior Hannibale,
Te mihi post quintos annorum Roma recursus
Reddidit et uotis iussit adesse suis.