Praefatio
Audebisne, precor, tantae subiecta cateruae,
Inter tot proceres, nostra Thalia, loqui?
Nec te fama uetat, uero quam celsius auctam
Vel seruasse labor uel minuisse pudor?
5
An tibi continuis creuit fiducia castris
Totaque iam uatis pectora miles habet?
Culmina Romani maiestatemque senatus
Et, quibus exultat Gallia, cerne uiros.
Omnibus audimur terris mundique per aures
10
Ibimus. ah nimius consulis urget amor!
Iuppiter, ut perhibent, spatium cum discere uellet
Naturae regni nescius ipse sui,
Armigeros utrimque duos aequalibus alis
Misit ab Eois Occiduisque plagis.
15
Parnasus geminos fertur iunxisse uolatus;
Contulit alternas Pythius axis aues.
Princeps non aquilis terras cognoscere curat;
Certius in uobis aestimat imperium.
Hoc ego concilio collectum metior orbem;
20
Hoc uideo coetu quidquid ubique micat.